Eins og mörg undanfarin ár verður hvatningaverkefni Forvarnamiðstöðvar GLEÐJUMST ALLSGÁÐ Í SUMAR sýnilegt á samfélags- og fréttavefsvæðum. Enn er vakin athygli á þáttum sem mest varða afleiðingar áfengis- og vímuefnaneyslu fólks yfir sumartímann; unglingadrykkju, ölvunarakstur og almenna ölvun. Hvatningatextinn Gleðjumst allsgáð verður látin flæða um annað upplýsinga- og fréttefni yfir sumarmánuðina júní, júlí og ágúst. Almennum texta um verkefnið er svo komið fyrir á vefsvæðum Forvarnamiðstöðvar www.foms.is .
1.
Viðhorf foreldra hafa mikil áhrif á vímuefnaneyslu barna.
Vinnum gegn neyslu vímuefna meðal barna og ungmenna með því að sýna árvekni:
– Kaupum ekki áfengi fyrir börn og unglinga
– Styðjum börn og ungmenni til þroskandi og uppbyggilegra viðfangsefna
– Verjum tíma með börnum okkar
– Verum góðar fyrirmyndir
– Tökum skýra afstöðu gegn vímuefnaneyslu barna
Rannsóknir sýna að tengsl eru á milli ýmissa neikvæðra hliða áfengis- og vímuefnaneyslu og þess að hefja neyslu áfengis á unga aldri. Áfengisneysla eykst verulega frá vori síðasta bekkjar í grunnskóla og fram á haust fyrsta bekkjar í framhaldsskóla:
– Meiri líkur eru á vandamálum í æsku, s.s. samskiptavanda við foreldra og fjölskyldu
– Meiri líkur eru á vandamálum tengdum námi og skólagöngu
– Meiri líkur eru á neyslu ólöglegra vímuefna
– Meiri líkur eru á misnotkun og mikilli og skaðlegri áfengisneyslu á fullorðinsaldri
2.
Akstur undir áhrifum áfengis eða vímuefna er ein af þremur algengustu orsökum banaslysa í umferðinni. Auk þess verða margir fyrir alvarlegu heilsutjóni, jafnvel ævarandi örorku, vegna ölvunaraksturs:
– Ökumenn hafið í huga að ekki er hægt að flýta fyrir niðurbroti vínanda í blóði með neinum hætti
– Kaffidrykkja, köld sturta, líkamsæfingar eða annað slíkt leiðir ekki til þess að það renni hraðar af fólki
– Ófrávíkjanleg regla ætti að vera að aka aldrei undir áhrifum vímugjafa.
– Geymum bílinn heima, fáum far með einhverjum sem er allsgáður eða tökum leigubíl
– Setjumst aldrei í bíl með bílstjóra undir áhrifum vímuefna
– Tilkynnum vímuakstur til lögreglu
3.
Ölvun og vímuástand slævir dómgreind, dregur úr hæfni til að draga ályktanir og hugsa rökrétt.
– Vímuð manneskja getur orðið sjálfum sér og öðrum til mikils ama og verið hættuleg
– Vímuástand býður margs konar hættu heim og auknum líkum á slysum og ofbeldi
![You are currently viewing Gleðjumst allsgáð í sumar!](https://foms.is/wp-content/uploads/2024/06/VefALLSGkassar1a.jpg)
Skilaboðin sem birtast á skjám landsmanna í sumar